17 nye kvalifiseringsprosjekt for at forsking skal takast i bruk

Kvalifiseringsprosjekta støttar tidleg utforsking av korleis lovande forskingsresultat kan gi nytte, og gir forskingsmiljø høve til å teste ut idear, vurdere potensiale, sikre immaterielle rettar, etablere kontaktar med investorar og gjere nødvendige avklaringar før neste steg.

Nytt i år er at 10 millionar kroner er øyremerkte prosjekt baserte på banebrytande, grunnleggjande forsking – med høg risiko og stor vitskapleg ambisjon.

– Å ta forskingsresultat heile vegen til samfunn og marknaden er viktig for å utvikle nye løysingar som samfunn og næringsliv har behov for. Kvalifiseringsprosjekta bidreg til nettopp dette, ved å støtte tidlegfase-aktivitetar som kan gjere lovande funn og idear klare for neste steg i løpet fram til å komme til nytte, seier områdedirektør for næringsliv og offentleg sektor Anne Kjersti Fahlvik.

Søknader blir fortløpande behandla gjennom året. Dei 17 prosjekta som til no i år får støtte, kjem frå eit breitt spekter av universitet, høgskular, institutt og helseføretak. Her er nokre døme:

• UiT – Noregs arktiske universitet skal utvikle ein radar som kan karakterisere og registrere små partiklar av romsøppel som stammar mellom anna frå satellittar som har gått i oppløysing av ulike grunnar, og som utgjer ein stor risiko for både astronautar og for satellittar som går i bane rundt jorda. Prosjektet byggjer på banebrytande forsking. 
• SINTEF Digital skal utvikle eit nytt lydsystem som forbetrar taleforståing i store rom med utfordrande akustikk – slik at fleire får med seg det som blir sagt.
• Akershus universitetssjukehus skal utvikle innovative medisinar mot Alzheimers sjukdom. Dette er ein kronisk hjernesjukdom og den vanlegaste årsaka til demens. Dei nye medisinane har potensial til både å lindre symptoma, men også verke mot dei underliggjande mekanismane til sjukdommen.
• Universitetet i Bergen skal utvikle ei ny behandling mot Covid-19 basert på plantebaserte stoff. Nye metodar for behandling av infeksjonar forårsaka av koronavirus er særleg viktig for høg-risikogrupper og for å vere førebudde til eventuelle nye pandemiar. 

Full oversikt over dei 17 kvalifiseringsprosjekta finn du her: Kvalifisering - Kommersialisering frå offentleg finansiert forsking 2025

Resultata frå kvalifiseringsprosjekta kan danne grunnlaget for vidare støtte gjennom verifiseringsprosjekt. Utlysinga for verifiseringsprosjekt i 2025 er no open. Verifisering – Kommersialisering frå offentleg finansiert forsking 2025